یمن اردو: جنوبی یمن کے صوبے لحج میں صنعاء کی افواج کی تیز پیش قدمی کے بعد سعودی دستوں نے یمن کے سب سے بڑے فوجی اڈے العند کو جلدی جلدی خالی کرنا شروع کر دیا ہے۔ یمنی خبر رساں ادارے یمن پریس ایجنسی نے لحج کے فوجی اور مقامی ذرائع کے حوالے سے بتایا کہ سعودی قیادت نے اڈے سے فوجی سامان اور بھاری ہتھیار فوری طور پر نکالنے کا حکم دیا ہے۔
ذرائع کے مطابق سعودی عرب کے حمایت یافتہ گروہ «درع الوطن» نے اڈے کے اندر موجود دستوں کے اسلحہ اور گولہ بارود کے گوداموں کو بڑے پیمانے پر خالی کرنا شروع کر دیا ہے اور یہ سامان عدن شہر کی طرف لے جایا جا رہا ہے۔ ذرائع کا کہنا ہے کہ یہ سب کچھ اڈے کے آس پاس کے اضلاع میں صنعاء کی افواج کی پیش قدمی سے پھیلے خوف کی وجہ سے ہو رہا ہے۔
مزید پڑھیں: لحج کے ضلع المقاطرہ میں سعودی حمایت یافتہ دستوں نے صنعاء کی افواج کے سامنے ہتھیار ڈال دیے، یمنی قبائلی ذرائع
یمن پریس ایجنسی کے مطابق یہ جلد بازی میں کیے گئے سعودی اقدامات اس کے بعد سامنے آئے جب صنعاء کی افواج نے لحج کے اضلاع المقاطرہ، طور الباحہ، المضاربہ اور راس العارہ پر تقریباً پورا کنٹرول حاصل کر لیا۔ اس طرح العند کا اہم فوجی اڈہ براہ راست صنعاء کی افواج کی مار میں آ گیا ہے اور سعودی حمایت یافتہ دستے ڈر کے مارے اپنے کیمپ سمیٹنے لگے ہیں۔
العند کا فوجی اڈہ لحج میں عدن کے شمال میں واقع ہے اور اسے یمن کا سب سے بڑا فوجی اڈہ سمجھا جاتا ہے۔ یہ پیش رفت ایسے وقت ہو رہی ہے جب یمن پر سعودی جارحیت اور محاصرہ جاری ہے اور صنعاء کی افواج زمینی محاذوں پر مسلسل آگے بڑھ رہی ہیں۔
ذریعہ: یمن پریس ایجنسی
